काठमाडौं । नेपाल प्रहरीमा एआईजीको दरबन्दी थपिएसँगै डीआईजीमा बढुवाका लागि दौडधुप सुरु भएको छ । बढुवा क्रममा रहेका एसएसपीहरूले डीआईजी बन्नका लागि दौडधुप सुरु गरेका हुन् ।
हाल नेपाल प्रहरीमा तीनज डीआईजीको दरबन्दी रिक्त रहेको प्रहरी प्रधान कार्यालयले जनाएको छ । तीन डीआईजीहरू वसन्तकुमार पन्त, धीरजप्रताप सिंह र रवीन्द्र धानुक एआईजीमा बढुवा भएपछि उनीहरूको स्थानमा डीआईजी बन्न एसएसपीहरूले सक्रियता बढाएका हुन् ।
निर्वाचन आचारसंहिता लाग्नुभन्दा पहिले बढुवा हुन पाए निर्वाचनको कमान्ड समेत गर्न पाउने भएकाले उनीहरू सक्रिय भएका हुन् । उनीहरूले प्रधानमन्त्री, गृहमन्त्री, संवैधानिक आयोगका प्रमुख, सत्तारूढ दलका नेताहरूसँग आफूलाई डीआईजीका लागि सिफारिस गर्न आग्रह गर्दै आएका छन् ।
प्रहरीमा सरुवा–बढुवामा शक्तिकेन्द्र धाउने पुरानै रोग हो । अहिले पहिलो चरणमै डीआईजी बन्न सके भावी आईजीपीको दौडमा कायम रहन सकिने भएकाले पनि शक्तिकेन्द्र रिझाउन सबैजसो एसएसपीहरू सक्रिय छन् ।
तीन डीआईजीका लागि तीन ब्याचका ३३ एसएसपी प्रतिस्पर्धामा छन् । डीआईजी प्रतिस्पर्धामा एसएसपीहरू उमेशराज जोशी, दीपक थापा, वसन्तबहादुर कुँवर, टेकप्रसाद राई, सन्दीप भण्डारी, अशोक सिंह, भीम ढकाल, रामदत्त जोशी, श्याम ज्ञवाली, दुर्गा सिंह छन् ।
यस्तै, एसएसपी विष्णु केसी, कुबेर कडायत, सुदीप गिरी, राजेश बास्तोला, जनक भट्टराई, केदार ढकाल, यज्ञविनोद पोखरेल पनि प्रतिस्पर्धामा छन् ।
डीआईजी बढुवामा उमेशराज जोशी, दीपक थापा, अशोक सिंह, रामदत्त जोशी, श्याम ज्ञवाली, सुदीप गिरी, टेकप्रसाद राईको चर्चा बढी छ ।
अहिले तीन डीआईजी बने पनि आउँदो वैशाख १९ गतेपछि भने अरूले पनि डीआईजी बन्ने अवसर प्राप्त गर्नेछन् । आईजीपी शैलेश थापा क्षेत्रीले वैशाख १९ मा अवकाश पाउनेछन् । उनीसँगै उनका ब्याची एआईजी र डीआईजी पनि अवकाशमा जानेछन् ।
यस्तोमा ठूलो संख्यामा एसएसपी दरबन्दी खाली हुनेछ । अहिले बढुवामा नपरेपछि केही महिनाभित्रै उनीहरूको पनि बढुवा हुने सम्भावना छ ।
अहिले बढुवामा पर्ने डीआईजीबाटै भावी आईजीपी बन्नेछन् । त्यसैले पहिलो चरणमा डीआईजी बन्न सबै शक्तिकेन्द्रको शरणमा पुग्न थालेका हुन् ।
