१५ चैत काठमाडौँ । जिल्ला गोरखा शहिद लखन गाउँपालिका समिरराज वाग्लेसहित २ जनालाई प्रहरीले रकम ठगी गरेको आरोपमा पक्राउ गरेको छ ।
पक्राउ पर्ने गोरखा शहिद लखन गाउँपालिका–८ घर भई हाल काठमाडौं टोखा नगरपालिका–९ बस्ने २८ वर्षीय समिरराज वाग्ले र रूकुम चौरजहारी नगरपालिका–४ घर भई हाल काठमाडौं महानगरपालिका–२६ नयाँ बसपार्क बस्ने २६ वर्षीय खड्कबहादुर भण्डारीलाई प्रहरीले पक्राउ गरेको हो ।
गोरखाका वाग्लेले वैदेशिक रोजगारमा न्यूजिल्याण्ड पठाईदिन्छु भन्दै पीडितबाट १ लाख ५० हजार रूपैयाँ रकम ठगी गरेको र खड्कबहादुरले रोमानिया पठाईदिन्छु भन्दै ३ लाख ५० हजार रूपैयाँ ठगी गरेको खुल्न आएको प्रहरीले जानकारी दिएको छ ।
काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले समिरलाई काठमाडौं मनमैजु र खड्क बहादुरलाई काठमाडौं नयाँ बसपार्कबाट पक्राउ गरेको हो । उनीहरूलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ ।
