२ वैशाख काठमाडौँ । रौतहटको बसपार्कमा भन्सार छलीका अवैध सामान बोकेको टेम्पो र चालक पक्राउ परेका छन् । सिमावर्ती भारतीय बजार बैरगनियाबाट भन्सार छली ल्याएको ४ लाख २९ हजार ९२० रुपैयाँ बराबरको कपडा, किराना बोकेको ना २ ह ४६६० नम्बरको टेम्पोसहित चालक पक्राउ परेका हुन् ।
पक्राउ पर्ने चालक परोहा नगरपालिका ४ का ३० वर्षीय उमेश कुमार यादवलाई जिल्ला प्रहरी कार्यालयबाट गएको टोलीले चेकजाँचको क्रममा पक्राउ गरेको जिल्ला प्रहरी प्रवक्ता डिएसपी दीपक कुमार रायले बताए ।
बरामद भन्सार छलीको सामानसहित टेम्पो र चालक यादवलाई आवश्यक कारवाहीको लागि जिल्ला भन्सार कार्यालय गौरमा बुझाईएको जिल्ला प्रहरी कार्यालय रौतहटले मंगलवार जारी गरेको सूचनामा उल्लेख गरिएको छ ।
प्रहरीको सक्रियताले बिगतको तुलनामा रौतहटमा भारतीय सामानको तस्करी न्यून प्रायः भएको जानकारहरुले बताएका छन् ।
