२२ पुस काठमाडौं — राष्ट्रिय स्वतन्त्र पार्टी (रास्वपा) म्याजिक नम्बर पुर्याउन इधर–उधर गर्ने खालको पार्टी नभएको स्पष्ट पार्दै पार्टीका नेता डा। स्वर्णिम वाग्लेले आगामी आम निर्वाचनमा १५१ सिट जित्ने लक्ष्यसहित अघि बढेको दाबी गरेका छन्।
शनिबार आयोजित एक कार्यक्रममा बोल्दै डा। वाग्लेले रास्वपाले सत्ताको अंकगणितभन्दा पनि स्पष्ट बहुमतसहित स्थिर सरकार निर्माण गर्ने उद्देश्य लिएको बताए। “हामी म्याजिक नम्बर पुर्याउन यता–उता मिलाउने राजनीति गर्दैनौं। जनताको स्पष्ट मतसहित १५१ सिट जित्ने लक्ष्यसहित हामी अघि बढिरहेका छौं,” उनले भने।
उनले पुराना दलहरूको अस्थिर गठबन्धन राजनीतिले देशलाई दीर्घकालीन समस्यामा पारेको आरोप लगाउँदै रास्वपाले नयाँ राजनीतिक संस्कार स्थापित गर्ने दाबी गरे। “देशलाई अब स्पष्ट दिशा र निर्णायक नेतृत्व चाहिएको छ। रास्वपा त्यसको विकल्प बनेर उभिएको छ,” वाग्लेले बताए।
डा। वाग्लेले सुशासन, पारदर्शिता र जवाफदेहितालाई पार्टीको मूल एजेन्डा रहेको उल्लेख गर्दै युवाहरू, पेशाकर्मी र विदेशमा रहेका नेपालीहरूको समेत रास्वपाप्रति बढ्दो आकर्षण देखिएको दाबी गरे। उनका अनुसार पार्टी संगठन विस्तार र नीति निर्माणमा तीव्र रूपमा अघि बढिरहेको छ।कार्यक्रममा उनले आगामी निर्वाचनसम्म पार्टीलाई वैकल्पिक शक्तिको रूपमा स्थापित गर्ने र जनताको विश्वास जितेर संसद्मा बलियो उपस्थिति बनाउने प्रतिबद्धता पनि व्यक्त गरे।
