२५ वैशाख काठमाडौँ । काठमाडौँमा युवक विपीनमाथि चक्कु प्रहार गरी हत्या गर्ने घटनाका मुख्य आरोपितमध्ये एकजना थुनाबाट छुटेको दोस्रो दिनमै हत्यामा संलग्न भएको खुलेको छ ।
पवन भट्टराई का अनुसार विपीनमाथि आक्रमण गर्ने दुई युवाको पहिचान भइसकेको भए पनि उनीहरू हालसम्म पक्राउ परेका छैनन् । घटनामा प्रयोग भएको हतियार चक्कु रहेको प्रहरीले जनाएको छ ।
प्रहरीका अनुसार विपीनलाई चक्कु प्रहार गर्ने मुख्य आरोपित कैलालीका राज विष्ट हुन् । उनी वैशाख २१ गते झैझगडा कसुरमा पक्राउ परेर छुटेका थिए । थुनाबाट छुटेको दोस्रो दिनमै उनी हत्या घटनामा संलग्न भएको अनुसन्धानबाट खुलेको प्रहरीले जनाएको छ ।चक्कु प्रहारपछि राज विष्ट कीर्तिपुर बाट भागेर ग्वार्को पुगेको लोकेसन ट्रयाकिङबाट देखिएको प्रहरीले बताएको छ ।
घटनाबारे जानकारी भएका तीन जना युवालाई प्रहरीले बुधबार नै पक्राउ गरेको छ । पक्राउ परेकामध्ये एकजनाको भूमिका शंकास्पद देखिएको भए पनि अन्य दुई जना प्रत्यक्ष रूपमा घटनामा संलग्न नरहेको प्रहरीको भनाइ छ ।घटनामा संलग्न दुवै आरोपितको खोजीकार्य तीव्र पारिएको प्रहरीले जनाएको छ ।
