७ जेष्ठ काठमाडौं । गोरखा ताकुकोट सेवासमाज काठमाडौं ले गणतन्त्र दिवस तथा सार्वजनिक बिदाको अवसर पारेर २०८३ साल जेष्ठ १५ गते खुला रक्तदान कार्यक्रम आयोजना गर्ने भएको छ। विगत वर्षहरूदेखि निरन्तर सामाजिक सेवामूलक गतिविधिमा सक्रिय रहँदै आएको समाजले यस वर्ष पनि “रक्तदान जीवनदान” भन्ने मूल नारासहित रक्तदान कार्यक्रम सञ्चालन गर्न लागेको जनाएको हो।
समाजका अनुसार कार्यक्रम काठमाडौंको बनस्थली चोकमा बिहान ८:०० बजेदेखि सुरु हुनेछ। रक्त अभावका कारण अस्पतालहरूमा बिरामीहरूले भोग्नुपरेको समस्यालाई मध्यनजर गर्दै मानवीय सेवाको भावना विस्तार गर्ने उद्देश्यले कार्यक्रम आयोजना गरिएको जनाइएको छ।
संस्थाले एक विज्ञप्तिमार्फत रक्तदानजस्तो पुण्य कार्यमा सहभागी भई कार्यक्रमलाई सफल बनाउन सम्पूर्ण स्थानीयवासी, साथीभाइ, आफन्तजन, शुभेच्छुक तथा समाजसेवी महानुभावहरूलाई हार्दिक अनुरोध गरेको छ। साथै, कार्यक्रमको जानकारी आफ्ना इष्टमित्र र समुदायसम्म पुर्याई बढीभन्दा बढी सहभागिता सुनिश्चित गर्न पनि आग्रह गरिएको छ।
समाजका पदाधिकारीहरूले “मानव सेवाभन्दा ठूलो धर्म अरू केही छैन” भन्ने भावनालाई आत्मसात गर्दै रक्तदानले कसैको अमूल्य जीवन बचाउन सक्ने भएकाले यस अभियानमा सबैले साथ दिनुपर्ने बताएका छन्। एक व्यक्तिले गरेको सानो सहयोगले गम्भीर अवस्थामा रहेका बिरामीको जीवन रक्षा गर्न महत्वपूर्ण भूमिका खेल्ने विश्वास समाजको रहेको छ।
विगत वर्षहरूमा समेत सफलतापूर्वक रक्तदान कार्यक्रम सम्पन्न गर्दै आएको समाजले यस वर्षको कार्यक्रमलाई अझ प्रभावकारी र सहभागितामूलक बनाउने तयारी गरेको जनाएको छ। गणतन्त्र दिवसको अवसरमा सामाजिक उत्तरदायित्व निर्वाह गर्दै मानव सेवामा समर्पित हुने उद्देश्यले आयोजना गरिएको उक्त कार्यक्रममा उल्लेखनीय सहभागिता रहने अपेक्षा गरिएको छ।
