१० जेष्ठ काठमाडौँ । नेपाली कांग्रेस गोरखाका नेता तथा कार्यकर्ताहरूले गण्डकी प्रदेशका मुख्यमन्त्री एवं नेपाली कांग्रेस गण्डकी संसदीय दलका नेता सुरेन्द्रराज पाण्डेसँग पोखरामा भेटवार्ता गरेका छन्। भेटपछि उनीहरूले सामूहिक तस्बिरसमेत खिचाएका छन्।
पोखरामा आइतबार नेपाली कांग्रेसको संस्थापनइतर समूहको भेला चलिरहेका बेला गोरखाबाट पुगेका नेता–कार्यकर्ताले मुख्यमन्त्री पाण्डेसँग समसामयिक राजनीतिक अवस्था, पार्टी संगठन सुदृढीकरण तथा जिल्लागत गतिविधिबारे छलफल गरेको जनाइएको छ।
भेटवार्तामा गोरखा जिल्लाको संगठन विस्तार, आगामी राजनीतिक रणनीति तथा प्रदेश सरकारसँग समन्वयका विषयमा समेत कुराकानी भएको सहभागीहरूले बताएका छन्। संस्थापनइतर समूहको भेलाले कांग्रेसभित्रको आन्तरिक राजनीतिक समीकरणलाई थप चासोको विषय बनाइरहेका बेला गोरखा कांग्रेस नेता–कार्यकर्ताको मुख्यमन्त्री पाण्डेसँगको भेटलाई अर्थपूर्ण रूपमा हेरिएको छ।
आज पोखरामा कांग्रेसको संस्थापनइतर समूहको भेला पनि आयोजना गरिएको थियो। उक्त भेलामा पार्टीको आन्तरिक एकता, संगठन सुदृढीकरण तथा समसामयिक राजनीतिक विषयमा छलफल भएको बताइएको छ। भेटपछिको सामूहिक तस्बिर सामाजिक सञ्जालमा समेत सार्वजनिक भएको छ।
