११ जेष्ठ काठमाडौँ । आगामी असारमा हुने भनिएको राष्ट्रिय स्वतन्त्र पार्टी (रास्वपा) को महाधिवेशन नजिकिँदै जाँदा पार्टी सभापति पदलाई लिएर नयाँ चर्चा सुरु भएको छ। सामाजिक सञ्जालमा रास्वपाका महामन्त्री भूपदेव शाहले वर्तमान सभापति रवि लामिछाने विरुद्ध सभापतिमा प्रतिस्पर्धा गर्न सक्ने दाबीहरू सार्वजनिक भइरहेका छन्।
विशेषगरी ‘जेन्जी आन्दोलन’ पछि बनेको नयाँ राजनीतिक समीकरण, काठमाडौंका पूर्वमेयर तथा हाल प्रधानमन्त्री बनेका भनिएका बालेन्द्र शाह (बालेन) र भूपदेव शाहबीचको निकट सम्बन्धलाई जोडेर विभिन्न अड्कलबाजी भइरहेका छन्। सामाजिक सञ्जालमा बालेन निकट मानिएका भूपदेव शाहलाई सभापतिको दौडमा उतार्ने तयारी भइरहेको दाबीसमेत गरिएका छन्।
चर्चामा के भनिएको छ ?
भूपदेव शाह काठमाडौं महानगरपालिकामा बालेन शाह मेयर हुँदा स्वकीय सचिवको भूमिकामा कार्यरत थिए। त्यसपछि बालेनको सिफारिस र निकटताका आधारमा उनी रास्वपामा प्रवेश गरी महामन्त्री पदमा पुगेको चर्चा हुने गरेको छ। अहिले बालेन प्रधानमन्त्री बनेको र उनका पूर्व स्वकीय सचिव पार्टीको महामन्त्री रहेको सन्दर्भलाई जोड्दै रास्वपाभित्र नेतृत्व परिवर्तनको तयारी भइरहेको अनुमान सार्वजनिक भइरहेका छन्।
यद्यपि, रास्वपाका आधिकारिक निकाय वा स्वयं भूपदेव शाहले सभापति पदमा उम्मेदवारी दिने विषयमा हालसम्म कुनै औपचारिक घोषणा गरेका छैनन्। पार्टी स्रोतहरूका अनुसार महाधिवेशनको मिति तय भएसँगै नेतृत्व, संगठन र भावी रणनीतिबारे आन्तरिक छलफल भने सुरु भएको छ।
रवि लामिछानेको नेतृत्व चुनौतीमा ?
रास्वपाका संस्थापक सभापति रवि लामिछाने अहिले पनि पार्टीभित्र प्रभावशाली नेतृत्वका रूपमा रहेका छन्। तर महाधिवेशन नजिकिँदै जाँदा वैकल्पिक नेतृत्वको बहस स्वाभाविक रूपमा उठ्ने राजनीतिक विश्लेषकहरूको भनाइ छ। यद्यपि भूपदेव शाह र रवि लामिछानेबीच प्रत्यक्ष प्रतिस्पर्धा हुने विषय अहिले सामाजिक सञ्जालको चर्चा र राजनीतिक अड्कलबाजीमै सीमित देखिएको छ।
रास्वपाको असारमा हुने भनिएको महाधिवेशनले पार्टीको भावी नेतृत्व, संगठनात्मक संरचना तथा राजनीतिक दिशा तय गर्ने भएकाले यसलाई चासोका साथ हेरिएको छ। तर सभापति पदमा को(को प्रतिस्पर्धामा उत्रिने भन्ने विषयमा औपचारिक चित्र भने अझै स्पष्ट भइसकेको छैन।
