२१ जेष्ठ काठमाडौँ । गोरखाको पालुङटार नगरपालिकाले बजार अनुगमनका क्रममा म्याद समाप्त भइसकेका खाद्य सामग्रीहरू बरामद गरी नष्ट गरेको छ।नगरपालिकाको अनुगमन टोलीले पालुङटार बजार क्षेत्रका विभिन्न पसल तथा व्यवसायिक प्रतिष्ठानहरूमा गरेको निरीक्षणका क्रममा उपभोग्य म्याद सकिएका खाद्य सामग्रीहरू बिक्रीका लागि राखिएको अवस्थामा फेला पारेको थियो। उपभोक्ताको स्वास्थ्यमा प्रतिकूल असर पर्न सक्ने ती सामग्रीहरू तत्काल जफत गरी नष्ट गरिएको नगरपालिकाले जनाएको छ।
अनुगमनका क्रममा व्यवसायीहरूलाई खाद्य वस्तुको गुणस्तर, म्याद तथा मूल्यसूची सम्बन्धी प्रचलित कानुनी व्यवस्था पालना गर्न समेत निर्देशन दिइएको छ। नगरपालिकाले उपभोक्ताको स्वास्थ्य र सुरक्षालाई उच्च प्राथमिकतामा राख्दै बजारमा गुणस्तरीय वस्तुको उपलब्धता सुनिश्चित गर्न नियमित अनुगमनलाई निरन्तरता दिने जनाएको छ।
नगरपालिकाका अनुसार म्याद गुज्रिएका वा गुणस्तरहीन वस्तुको बिक्री–वितरण गर्ने व्यवसायीमाथि प्रचलित कानुन बमोजिम आवश्यक कारबाही गरिनेछ। साथै व्यवसायीहरूलाई उपभोक्तामैत्री सेवा प्रदान गर्न र खाद्य सुरक्षासम्बन्धी मापदण्डको पूर्ण पालना गर्न आग्रह गरिएको छ।
स्थानीयवासीले पनि बजार अनुगमनलाई प्रभावकारी बनाउँदै उपभोक्ताको हित संरक्षणका लागि नगरपालिकाले थालेको अभियानको स्वागत गरेका छन्। पालुङटार नगरपालिकाले आगामी दिनमा समेत बजार व्यवस्थापन, खाद्य सुरक्षाको सुनिश्चितता तथा उपभोक्ता अधिकार संरक्षणका लागि नियमित रूपमा अनुगमन अभियान सञ्चालन गर्ने जनाएको छ।
