१० साउन काठमाडौँ । प्रदेश सरकारको निरन्तरताका लागि आज नेकपा एमाले र नेपाल कम्युनिस्ट पार्टीबीच औपचारिक रूपमा सहकार्यसम्बन्धी हस्ताक्षर सम्पन्न भएको छ। नेपाली कांग्रेसले सत्ता समीकरणबाट आफ्नो समर्थन फिर्ता लिएपछि सरकार अल्पमतमा पर्ने अवस्था सिर्जना भएको थियो। त्यसपछि सरकार जोगाउने उद्देश्यले एमाले र नेपाल कम्युनिस्ट पार्टीबीच नयाँ राजनीतिक सहकार्य भएको हो।
आज सम्पन्न हस्ताक्षर कार्यक्रममार्फत दुवै दलले प्रदेश सरकारलाई निरन्तरता दिने, विकास निर्माणका कामलाई प्रभावकारी बनाउने तथा राजनीतिक स्थायित्व कायम गर्ने प्रतिबद्धता व्यक्त गरेका छन्। गठबन्धनका नेताहरूले प्रदेशको समृद्धि, सुशासन र जनताका अपेक्षाअनुसार काम गर्न आपसी सहकार्यलाई अझ सुदृढ बनाइने बताएका छन्।
यसअघि प्रदेश सरकार नेपाली कांग्रेस र नेकपा एमालेको सत्ता गठबन्धनबाट सञ्चालन हुँदै आएको थियो। तर कांग्रेसले सत्ता समीकरणबाट बाहिरिने निर्णय गरेपछि सरकारको भविष्य अन्योलमा परेको थियो। त्यसपछि एमालेले नेपाल कम्युनिस्ट पार्टीसँग सहकार्य गर्दै नयाँ राजनीतिक समीकरण निर्माण गरेको हो।
नयाँ सहकार्यसँगै प्रदेश सरकारलाई आवश्यक बहुमत कायम रहने विश्वास गरिएको छ। आगामी दिनमा मन्त्रिपरिषद् पुनर्गठन, जिम्मेवारी बाँडफाँट तथा साझा न्यूनतम कार्यक्रम सार्वजनिक गर्ने विषयमा पनि छलफल अघि बढ्ने जनाइएको छ।राजनीतिक वृत्तमा यो नयाँ समीकरणलाई प्रदेश सरकारको स्थायित्वसँग जोडेर हेरिएको छ भने यसको प्रभाव आगामी राजनीतिक गतिविधिमा समेत पर्ने विश्लेषण गरिएको छ।
