१६ असोज गोरखा । नेपाली कांग्रेसको १५औँ नियमित महाधिवेशनअन्तर्गत शेरबहादुर देउवा पक्षले गोरखाको बारपाक सुलिकोट गाउँपालिका–५ ताकुमाझ लाकुरीबोटको वडा सभापतिमा नवयुवक गणेश कामीलाई निर्वाचित गरेको छ ।
कांग्रेसको महाधिवेशनअन्तर्गत वडा तहमा भइरहेको अधिवेशनका क्रममा कामी वडा सभापतिमा निर्वाचित भएका हुन् । युवालाई नेतृत्वमा अघि बढाउने क्रममा कामीलाई वडा सभापतिको जिम्मेवारी दिइएको हो ।
यसअघि गगन थापा पक्षले पनि बारपाक सुलिकोट गाउँपालिका–५ ताकुमाझ लाकुरीबोटमा वडा अधिवेशन सम्पन्न गरिसकेको थियो । कांग्रेसको १५औँ महाधिवेशनका क्रममा जिल्लाका विभिन्न वडा तथा स्थानीय तहमा दुवै पक्षले संगठनात्मक गतिविधि र अधिवेशनलाई तीव्रता दिएका छन् ।
बारपाक सुलिकोट गाउँपालिकाको अधिवेशन भने आगामी असोज २० गते पाल्खुमा आयोजना हुने भएको छ । गाउँपालिका अधिवेशनबाट नयाँ नेतृत्व चयनसँगै पार्टीको आगामी संगठनात्मक गतिविधिलाई थप व्यवस्थित बनाउने तयारी गरिएको छ।
