काठमाडौं । जनकपुर–जयनगर रेल प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले भर्चुअल रूपमा उद्घाटन गर्ने भएका छन् । शनिबार दिल्लीको हैदरवाद हाउसबाट संयुक्त रूपमा रेल उद्घाटन गर्ने कार्यक्रम छ । नेपालका प्रधानमन्त्री शेरबहादुर देउवा आज त्यसतर्फ जाँदै छन् ।
नेपाल रेलवे कम्पनीका महाप्रबन्धक निरञ्जन झाले दिल्लीको हैदरवाद हाउसबाट संयुक्तरूपमा रेल उद्घाटन हुने र रेल कुर्था पुगेर फर्केपछि जनकपुरधाममा पनि उद्घाटन गरिने जानकारी दिए ।
उद्घाटनपछि आइतबारदेखि दैनिक आउने–जाने गरी रेल दुईपटक चल्ने महाप्रबन्धक झाले जानकारी दिए । उनका अनुसार बिहान साढे ८ बजे जयनगरबाट कुर्थाका लागि रेल चल्नेछ । दुई घन्टामा कुर्था स्टेसन पुग्ने बताइएको छ ।
कुर्थाबाट पौने ११ बजे जयनगरका लागि रेल प्रस्थान गर्ने समय तालिका छ । सो रेल साढे १२ बजे जयनगर स्टेसनमा पुग्नेछ ।
जयनगर गएको रेल पुनः ३ बजे फर्केर आउनेछ भने बिहान साढे ८ बजे जयनगरबाट आएको रेल बेलुका सवा ५ बजे फर्कने गरी तालिका निर्धारण गरिएको छ ।
टिकट अनलाइन र अफलाइन दुवै माध्यमबाट लिन सकिने व्यवस्था गरिएको छ । नेपाल रेल्वे कम्पनीले जनकपुरधामदेखि जयनगरसम्मको भाडा सामान्य कोचको ७० र एसी कोचको ३५० रुपैयाँ निर्धारण गरिएको छ ।
जनकपुर–जयनगर रेल उद्घाटन कार्यक्रममा सहभागी हुन भौतिक पूर्वाधार तथा यातायातमन्त्री रेणुकुमारी यादव शुक्रबार जनकपुर आइसकेकी छिन् ।
